Rais wa Zanzibar na Mwenyekiti wa Baraza la Mapinduzi, Alhaj Dk. Hussein Ali Mwinyi ametoa Shukrani kwa wale wote wanaomuombea Dua Marehemu Rais Mstaafu wa Zanzibar na Rais wa Jamhuri ya Muungano wa Tanzania Hayati Mzee Ali Hassan Mwinyi tokea alipofariki Tarehe, 29 Februari 2024 hadi leo.
Alhaj Dk.mwinyi ametoa Shukrani hizo Masjid Mushawar Mwembeshauri mara baada ya kumalizika kwa dua ambayo iiliyoandaliwa na Chama cha Mapinduzi (CCM) Zanzibar, ambapo amesema kwa niaba ya familia ametoa Shukrani kwa Waandaaji wote kwa siku zote kwani kitu kinachomnufaisha Mtu aliefariki ni Dua tu.
Akitoa neno la Shukrani Naibu Katibu Mkuu CCM Zanzibar Nd. Said Mohamed Dimwa amesema Chama Cha Mapinduzi kimeandaa Dua hiyo ni kuungana na Familia na Wananchi wote wa Zanzibar katika kumuombea Dua Marehemu Mzee Ali Hassan Mwinyi ambae pia alikuwa ni Mwenyekiti wa chama cha Mapinduzi Mstaafu.
Dua hiyo iliongozwa na Mufti Mkuu wa Zanzibar Sheikh Saleh Omar Kaabi na imehudhuriwa na viongozi wa dini, serikali,wanachama wa Chama cha Mapinduzi na Wananchi.
